აჭარის ავტონომიური რესპუბლიკის მთავრობის თავმჯდომარემ სულხან თამაზაშვილმა ბათუმის მერიის თანამშრომლებს მერის მოვალეობის შემსრულებლად გიორგი ცინცაძე წარუდგინა
აჭარის ავტონომიური რესპუბლიკის მთავრობის თავმჯდომარემ სულხან თამაზაშვილმა ბათუმის მერიის თანამშრომლებს მერის მოვალეობის შემსრულებლად გიორგი ცინცაძე წარუდგინა, რომელიც აქამდე აჭარის მთავრობის აპარატის უფროსის თანამდებობას იკავებდა.
გიორგი ცინცაძემ გამოთქვა მზადყოფნა მაქსიმალური ძალისხმევით იზრუნოს ქალაქის განვითარებაზე, მიმდინარე პროექტების წარმატებით დასრულებასა და ახალი ინიციატივების განხორციელებაზე.
გიორგი ცინცაძეს საქართველოს ტექნიკურ უნივერსიტეტში, ფინანსების სპეციალობით მიღებული აქვს ბაკალავრის ხარისხი. ამავე პერიოდში, 2005-2006 წლებში გაცვლითი პროგრამით სწავლობდა ბერლინის გამოყენებითი მეცნიერებების უნივერსიტეტის „FHTW“. ასევე, სხვადასხვა ქვეყანაში გავლილი აქვს კვალიფიკაციის ასამაღლებელი არაერთი ტრენინგი და კურსი. გიორგი ცინცაძე, სხვადასხვა წლებში, მნიშვნელოვან თანამდებობებს იკავებდა საქართველოს დაზვერვის სამსახურში და საგარეო საქმეთა სამინისტროში.
სულხან თამაზაშვილმა, მადლობა გადაუხადა გიორგი მურვანიძეს ბათუმის მერის მოვალეობის შემსრულებლის პოზიციაზე ყოფნისას გაწეული საქმიანობისთვის და წარმატებები უსურვა გიორგი ცინცაძეს ახალ თანამდებობაზე.
