ბათუმი ავარიული სახლების გარეშე
„ბათუმი ავარიული სახლების გარეშე“ სახელმწიფო მიზნობრივი პროგრამის ფარგლებში საცხოვრებელი სახლების მშენებლობისა და გამაგრების სამუშაოები ინტენსიურად გრძელდება.
სამუშაოების მიმდინარეობას ბათუმის მერის მოვალეობის შემსრულებელი გიორგი მურვანიძე გაეცნო.
პროგრამა ითვალისწინებს ბათუმის ადმინისტრაციულ საზღვრებში არსებული ავარიული შენობების ჩანაცვლებას თანამედროვე ტიპის უსაფრთხო საცხოვრისით.
ამ ეტაპისთვის ახალი საცხოვრებელი კორპუსების მშენებლობა მიმდინარეობს 3 მისამართზე - ე.წ. შანხაის დასახლებაში, მაიაკოვსკისა და სელიმ ხიმშიაშვილის ქუჩებზე.
მიმდინარე წელს ავარიული საცხოვრებელი სახლების დემონტაჟი და ახალი კორპუსების მშენებლობა დაგეგმილია 2 მისამართზე - გრიშაშვილის ქუჩის N7-სა და ლერმონტოვის ქუჩის N102-ში.
რაც შეეხება საცხოვრებელი სახლების გამაგრებას, სამუშაოები მიმდინარეობს და დაგეგმილია ჯამში 6 მისამართზე.
