საკრებულოს სხდომა
დღეს ბათუმის საკრებულოს სხდომა გაიმართა, რომელზეც დღის წესრიგით გათვალისწინებული საკითხები განიხილეს.
საკრებულომ დაამტკიცა განკარგულება ქალაქ ბათუმის მუნიციპალიტეტის საკუთრებაში რეგისტრირებული უძრავი ქონების აჭარის ავტონომიური რესპუბლიკისათვის უსასყიდლოდ, საკუთრებაში გადაცემის თაობაზე, რაც გულისხმობს ტბელ აბუსერიძის ქ. #17-ის მიმდებარედ არსებული 36 კვმ არასასოფლო-სამეურნეო დანიშნულების მიწის ნაკვეთის გადაცემას, შემდგომში აჭარის ავტონომიური რესპუბლიკის ფინანსთა და ეკონომიკის სამინისტროს მიერ მიმდებარედ არსებულ მიწის ნაკვეთებთან გაერთიანებისა და ერთ ლოტად განკარგვის მიზნით.
დამტკიცდა ცვლილება მუნიციპალიტეტის საკუთრებაში არსებული საპრივატიზაციო ობიექტების ნუსხასა და პრივატიზაციის გეგმაში.
საკრებულომ მიიღო დადგენილება ქალაქ ბათუმის მუნიციპალიტეტის ქალთა და ბავშვთა საკითხებზე მომუშავე მუნიციპალური საბჭოს შექმნისა და მისი დებულების დამტკიცების შესახებ.
დღესვე დამტკიცდა განკარგულება წმინდა სევერიანე აჭარელის ქუჩიდან იოსებ ნონეშვილის ქუჩის კვეთამდე არსებული მონაკვეთისათვის გიორგი ცაბაძის სახელის მინიჭების თაობაზე.
მიღებული იქნა განკარგულება მიხეილ შარაშიძის V ჩიხის ქუჩად ჩამოყალიბებისა და გია ყანჩელის სახელის მისანიჭებლად, გარდაცვალების ვადის შეზღუდვიდან გამომდინარე, გამონაკლისის დაშვების მიზანშეწონილობის შესახებ.
ასევე გასწორდა ტექნიკური შეცდომა ზედაღელის ქუჩისა და ზედაღელის შესახვევებისათვის კახი კავსაძის ქუჩისა და კახი კავსაძის შესახვევების მინიჭების თაობაზე ქალაქ ბათუმის მუნიციპალიტეტის საკრებულოს 2023 წლის 31 მაისის №გ-15.152329711 განკარგულებაში.
დამტკიცდა გარკვეულ ტერიტორიებზე განაშენიანების დეტალური გეგმა, ასევე, ტექნიკური ხასიათის ცვლილება დეტალურ გეგმასა და განაშენიანების რეგულირების გეგმის გეგმარებით დავალებაში.
